Keçən yazımın davamı olaraq bu gün sizinlə icraçı-sifarişçi münasibətlərindən danışmaq istəyirəm. Xatırladım ki, "Rəqəmlər yalan danışmır" adlı bloqumuzda rəqəmsal xidmətlərdə şirkətlərin icraçılardan hansı nəticələri gözləməli olduğunu qeyd etmişdik.

Müxtəlif alətlərlə effektiv nəticələr qazanmaq istəyən şirkətlər və bu xidmətdən istifadə edib uğur əldə etmək istəyən müştərilərin sayı günbəgün artır. Müştəri üçün hər gün yenilənən alətlər son nəticədə eyni xidməti göstərir (məsələn, Google, Facebook, Instagram-da reklam), çünki hər kəs o platformalardan rahat şəkildə istifadə edə bilir. Müştərinin bu halda seçim imkanı çox olsa da bu onun işini heç də asanlaşdırmır, çünki işinin qaydasında gedib-getmədiyini ölçə bilmir. Əgər sizdə də “İcraçıya necə nəzarət edək?” sualı yaranırsa, bu bloq sizlər üçündür.

İcraçının fəaliyyətinin effektiv olmamasını yalnız bir neçə ay birlikdə işlədikdən sonra anlaya bilirsiniz. Yaşadığımız dönəmdə bir ay belə səhv aparılan reklam sizin üçün çoxsaylı müştəri, pul və zaman itkisinə çevrilir. Bəs rəqəmsal marketinq üzrə peşəkar deyilsinizsə, yeni başlamısınızsa və ya ümumiyyətlə bunları öyrənmək üçün vaxtınız yoxdursa bu riski azaltmaq mümkündürmü?

Düşünürəm ki, əvvəlcədən bəzi faktorlara fikir verməyiniz, gedən proseslərə nəzarət etməyinizi asanlaşdıracaq və həyacan siqnallarını dərhal eşitməyinizə kömək edəcək. 

1. Gizlədirlər.

“Google analytics” və ya digər istifadə olunan izləmə sistemlərindən istifadə edə bilmirsiniz.

İcraçı – sifarişçi münasibətləri dostluq yox, dürüstlük üzərində qurulmalıdır. İkinci olandan sonra, avtomatik birinci də qazanılır. Müştəri aydın şəkildə nəticələri və işin gedişatını görməlidir. Əgər icraçı hesabları paylaşmağa hazır deyilsə bilin ki, mütləq bir və ya daha çox problem var! Fəaliyyətim ərzində təəssüf ki, dəfələrcə bu halın hansı nəticələrlə yekunlaşdığının şahidi olmuşam. Məsələn, bir şirkətdə çalışan işçi ayın sonunda hesabat təqdim edirdi.  Bu hesabatda nəticələr düz göstərilsə də onların hansı məbləğlə əldə olunduğu yanlış yazılırdı (məbləğ daha çox yazılırdı). İkinci misal, keçən il bir şirkətdən bizə müraciət olundu. Dedilər ki, Facebook reklam hesabımızı bağlayıb və biz yenisini aça bilmirik. Bir neçə cəhd edəndən sonra başladım suallar verməyə, əvvəllər qəbul etməsələr də sonra aydın oldu ki, bu şəxslər müxtəlif hesablar açıb səhifədə reklam veriblər. Facebook-da borc yaranan kimi, yenisini açıb ordan reklam verməyə başlayıblar. Bu bir il davam edib. Şirkət isə ödədiyi pul, Facebook-a deyil, onların cibinə gedirmiş. İndi isə onlar nəinki bu səhifədən reklam verə bilirlər, o adda yenisini belə aça bilmirlər.

2. Fikirlərinizə önəm verilmir.

İşinizi görən şəxs müəyyən təcrübəyə, biliyə malikdir və əlbəttə ki, reklamı necə verəcəyini onlara əsaslanaraq edəcək, amma bunu da unutmaq olmaz ki, biznesinizi sizdən yaxşı heç kim bilə bilməz. Biznesinizi yalnız saytınızda yazılanlar qədər bilən şəxs sizin dəstəyiniz olmadan faydalı ola bilməyəcək. Buna görə də ilk zamanlar sizə xidmət və məhsul, onların fərqindən, müştəri tiplərindən, qarşılaşdığınız problemlərdən  çox sual verməyi nəinki normal haldır, həm də çox vacibdir. Yalnız bu halda o, şirkətiniz üçün adekvat reklam strategiyasını tərtib edə biləcək.
Ən çox qarşılaşdığım cümlələr:

• “Mən müştərimi yormuram”
• “Müştərimin başı çıxmır”

Əlbəttə ki, o CTR,  CPC, konversiya %-i barədə məlumatsızdır, əks halda sizinlə işləməzdi. Onun ən yaxşı bildiyi və icraçının bilmədiyi əsas məsələ ONUN biznesidir.

• “Mənim artıq bu sferada təcrübəm var”

Bu əladır, amma hər şirkətin öz xüsusiyyətləri var. Uğurlu nəticələr əldə etmək istəyən icraçı müştəri ilə ilk zamanlarda daha çox zaman keçirməli, həmçinin xidmət və məhsullardan istifadə etməlidir.

Əgər mütəxəssis sizdən heç nə soruşmursa, qərarlarını paylaşmırsa, fikirlərinizə önəm vermirsə bu o deməkdir ki, o sizin biznesinizi də tam anlamayacaq.

3. Strategiya razılaşdırılması. 

​İşə başlamamışdan öncə şirkətlə son görüşdə qərar verirsiniz ki, effektivliyi görmək üçün zaman lazımdır. Aylar keçir və siz səbirlə gözləyirsiniz ki, xərclədiyiniz pulların geri dönüşü olacaq. Şirkət doğrudan da hər ay böyük nəticələr (rəqəmlər) sizə təqdim edir və siz o gözəl günü gözləməyə davam edirisiniz. Problem nədədir?

Son razılaşmada əsas göstəricilər müəyyən edilməli idi. İcraçı üçün şirkətə gələn zənglərin sayı, amma şirkət üçün sırf bir xidmət üçün gələn zənglər vacib ola bilər. İcraçı, sayta giriş sayını artırmağa çalışa bilər, amma şirkətə sifariş sayı vacibdir və s.

Bundan öncə yazdığım bloq sırf bu mövzuya aid idi - KPI-ların təyin olunması. Hər iş strategiya üzərindən aparılmalıdır və bunun üçün də mütəxəssis şirkətiniz haqqında tam məlumat aldıqdan sonra gözlənilən nəticələri tərtib edib sizinlə müzakirə aparmalıdır.

4. Kifayətlənənlərdən qorxun.

İndi təsəvvür edək ki, bəxtinizə yaxşı şirkət düşüb. Strategiya yazmaq üçün sizdən kifayət qədər məlumat alıb, profilə giriş imkanı yaradıb və qeyd etdiyi nəticələrə də çatır.

Bəlkə də saytınız əla işləyir, reklamınız da qaydasındadır və heç bir probleminiz yoxdur. “Tam istədiyim” deməyə tələsməyin, çünki iş burada bitmir. Bizim rəqəmsal aləmə demək olar ki, hər ay yeniliklər gəlir, istifadə edə biləcəyimiz alətlərin sayı da hər gün artır. Bütün yeniliklər bizə yeni imkanlar yaradır.Əgər bu imkanları axtaran yoxdursa demək yenə böyük probleminiz var.

Yuxarıda qeyd etdiyim problemlərlə qarşılaşmamaq üçün ilk öncə işinizi görən şəxslərin mütəxəssisliyinə diqqət yetirin. Çalışın müqavilədə sizin üçün risk olan məqamları nəzərə alın. Reklam vasitəsi ilə həll etmək istədiyiniz məqsədləri icraçı ilə müzakirə edin və bu məqsədlərə necə çatacağınızı, nə formada və necə ölçəcəyinizi əvvəlcədən danışın.

Əgər şirkətinizlə problem yaşayırsınızsa onu dəyişməyə tələsməyin, bu hər zaman ən yaxşı çıxış yolu deyil. Şirkətlə problemlərinizi müzakirə edib və ən optimal həlli tapa bilərsiniz.

Müəllif: Aynur Xan